【遇見野生海豚四不做】
最近香港既水域有一條亞熱帶斑海豚出現～ 可以係香港見到比較少見既野生海豚，相信大家都覺得好新奇。但開心之餘都要記得以下四點，唔好過份騷擾同影響到佢呀。
1. 不餵飼
野生海豚能夠自己覓食，餵飼食物會令佢地開始依賴人類，減低對人類既警覺性及捕食能力，甚至主動接近船隻，產生危險。佢地始終係野生動物，能夠自己覓食～
2. 不觸碰
接觸海豚有機會互相感染細菌病毒，對人類無大影響既細菌病毒有可能令海豚致命，而同人類有過多既交流亦可能會減低海豚搵番同伴既意欲。
3. 不干擾
干擾海豚有可能令佢地處於壓力之下，甚至影響佢地自然既休息，覓食等等。所以有幸遇到佢地，係遠處靜靜觀察就可以，咁樣做亦都更加容易觀察到海豚珍貴既自然行為。
4. 不靠近
船隻過份靠近海豚，有機會撞擊到佢地，對海豚帶來不可逆轉既傷害。最近出現係香港水域既Dave 都被發現身上多左疑似俾螺旋槳打傷既傷痕。其實香港水域擱淺既海豚亦經常發現有撞船既痕迹，所以保持適當距離非常重要，可以大大減低海豚受傷的風險。
相信每一個人都希望海豚能夠一直健康平安。
如果大家係香港見到擱淺海豚，可以致電 1823 熱線，提供番發現擱淺既時間、地點同相片，就會有人跟進架啦～